Amosando 8 resultados

Unha das finalidades do AEG consiste na recuperación, salvagarda e difusión do patrimonio documental precedente das asociacións ou centros galegos espallados polo mundo. Esta labor desenvólvese de maneira sistemática desde o ano 2003 e resulta primordial para evitar o deterioro ou extravío da documentación societaria xerada polas entidades de emigrantes galegos e galegas, tanto no Exterior como no resto de comunidades autónomas. Mediante a difusión do patrimonio documental e gráfico cúmprese o fiel compromiso de poñer dito patrimonio á disposición dos usuarios para a súa consulta e reprodución, pois constitúe unha valiosa fonte de información.

Este fondo documental comprende documentación de distinta índole, como por exemplo: estatutos, libros de actas das xuntas directivas, libros de socios, correspondencia, memorias sociais, folletos con información sobre as distintas actividades societarias etc. Os soportes documentais obedecen tanto a versións orixinais, como a dixitalizacións ou copia xerográfica.
A colaboración dos distintos responsables políticos en materia de emigración da Xunta de Galicia fixo posible a realización deste proxecto do AEG.

A colección especial do MFOG comeza a tomar forma no ano 2005. Trátase dunha liña de traballo que consiste na reunificación parcial, procesamento, conservación, posta en valor e difusión da documentación e materias xerados por organizacións de mulleres e/ou feministas que desenvolveron ou desenvolven a súa actividade en Galicia. Atende polo tanto grupos e colectivos que se articulan de xeito independente e tamén aos que o fan como parte ou unidade específica de organizacións culturais, sociais e político reivindicativas de diferente dimensión.

Os materiais presentan diferentes tipoloxías: pancartas, carteis, publicacións periódicas, dípticos, autocolantes, bandeiras, panos, boletíns, monografías, materiais de xornadas, reunións, encontros, e documentación interna como estatutos, libros de actas, correspondencia. Estes chegan ao arquivo grazas á participación de persoas e entidades que decidan colaborar no proxecto, sempre abertas a novas incorporacións, mediante formulas de doazón e cesión temporal para a dixitalización.

Fondo cultural procedente de doazóns e depósitos. Composto por documentación de asociacións e sociedades de interese para a cultura galega.

O Arquivo da Emigración Galega (AEG) foi creado en 1992 como unha iniciativa promovida polo Consello da Cultura Galega (CCG), configurándose como centro de documentación, investigación e difusión referencial para persoal investigador e calquera persoa interesada no estudo do fenómeno da emigración galega.

CADRO DE CLASIFICACIÓN DOS FONDOS DOCUMENTAIS DO AEG:

1. Documentación das Asociacións de Emigrantes
2. Documentación de particulares (arquivos persoais e familiares)
3. Documentación de organismos oficiais
4. Coleccións

Neste repositorio están accesibles as descricións arquivísticas de toda a colección "Documentación das Asociacións de Emigrantes", e moitas delas xa dispoñen do documento asociado en formato dixital.
Co obxectivo de faciliar o acceso en liña a toda esta documentación, seguimos completando os rexistros periodicamente enriquecéndoos co seu obxecto dixital asociado.

O Arquivo Sonoro de Galicia desenvólvese como proxecto de traballo dentro do Consello da Cultura Galega, dun xeito continuado dende 1995, aínda que os seus primeiros traballos comezan en 1992. Dende este momento, asume a responsabilidade de preservar un patrimonio cultural sonoro galego que abrangue numerosos eidos do coñecemento, tanto en ámbitos públicos coma privados, xa sexa en gravacións inéditas ou editadas.

Os fondos do Arquivo Sonoro de Galicia do Consello da Cultura Galega proceden da xenerosidade de particulares, institucións públicas e privadas, discográficas, editoriais e músicos que entenden o noso proxecto como a iniciativa máis salientable para a recuperación, conservación e difusión do patrimonio sonoro galego. Estas achegas procedentes de diferentes eidos permítennos unha constante ampliación e complementariedade dos nosos fondos documentais.

A creación do Centro de Documentación en Igualdade e Feminismos (CDIF), aprobada polo Pleno do Consello da Cultura Galega o 25 de xullo 2019, é o resultado de liñas de reflexión, proxectos e prácticas desenvolvidas na institución en materia de igualdade, feminismos, mulleres, sexos, xéneros e sexualidades en diferentes áreas de investigación e acción social: ciencia, filosofía, socioloxía, antropoloxía, política, cultura, dereito, historia, educación, traballo, economía, arte, música, antropoloxía, literatura, lexislación, psicoloxía, saúde, centros da memoria, ….
A máis de promover espazos de coñecemento e reflexión, e grupos de traballo específicos para o estudo e a elaboración de informes e actividades, o CDIF, desenvolve liñas de acción centradas no patrimonio documental e destinadas á recuperación e posta a disposición pública de materiais de arquivo, bibliografía, recursos hemerográficos, webgráficos ou audiovisuais.

Unha das finalidades do CDIF, consiste na recuperación da documentación arquivística e documental producida grupos e colectivos feministas e/ou de lesbianas, bisexuais, transexuais, intersexuais, queer, …, con actividade en Galicia. Trátase de contribuír á desaparición, deterioro ou extravío deste valioso patrimonio documental imprescindible para entender e explicar o pasado e os tempos máis actuais.

Na incorporación de fondos, o proxecto "Memoria en movemento" emprega formulas de doazón e cesión temporal para a dixitalización, sempre abertas ás persoas e entidades que decidan participar no proxecto.

Memoria en movemento presta atención ás redes de relación das organizacións obxecto de interese, e abrangue dous fondos especiais interconectados entre sí:

• MFOG: consiste na reunificación parcial de materiais producidos por grupos e colectivos de mulleres e/ou feministas con actividade en Galicia, organizados de xeito independente ou con espazo propio dentro de entidades maiores
• LGTBIQ+: consiste na reunificación parcial de materiais producidos por grupos e colectivos de lesbianas, gais, transexuais, bisexuais, intersexuais ou queer con actividade en Galicia, organizados de xeito independente ou con espazo propio dentro de entidades maiores.

O principal obxectivo do CDSG é participar, como axente activo, no proceso de normalización do idioma galego, propiciando o intercambio e difusión dos materiais xerados neste proceso e creando foros de debate e reflexión arredor da planificación lingüística en Galicia.
Como Arquivo de Planificación Lingüística, compilamos a documentación relacionada coa planificación tanto do galego como doutras linguas minorizadas con situacións sociolingüísticas semellantes á nosa. Como Centro de Documentación Sociolingüística, xestionamos a documentación e información que xera a planificación lingüística para que volva reverter nos diferentes axentes sociais implicados no proceso.
Estamos traballando na posta a disposición da Documentación especial do CDSG, que reúne mostras das valiosas iniciativas que conforman o noso patrimonio sociolingüístico. Podes atopar máis información aquí: https://consellodacultura.gal/paxina.php?id=8476

Fondo cultural procedente de doazóns e depósitos. Composto por fondos persoais e familiares, e coleccións de interese para a cultura galega.